Hvernig leysum við flókin vandamál?
Þann 6. til 10. júlí síðastliðinn, sótti Sæunn Gísladóttir, sérfræðingur hjá Rannsóknamiðstöð Háskólans á Akureyri (RHA), námskeiðið Problem Solving & Decision Making, sem haldið var á vegum ShipCon í Palermo á Sikiley.
Námskeiðið er meðal annars ætlað skólastjórnendum, kennurum, og akademísku starfsfólki, sem vill efla færni sína í gagnrýninni hugsun og upplýstri ákvarðanatöku. En aðalmarkmið námskeiðsins voru meðal annars að:
- skilgreina og greina vandamál
- framkvæma rótargreiningu (e. root cause analysis)
- þróa viðmið til að meta mismunandi lausnir
- velja bestu lausnina og sannreyna árangur hennar
- undirbúa innleiðingar-, samskipta- og eftirfylgnisáætlanir
Hugsunarhattar voru hápunktur
Námskeiðið var í boði í svokölluðu Erasmus+ mobility og var kennt af Angela Winstanley, félagsráðgjafa með víðtæka reynslu af því að stjórna teymum á flóknum sviðum.
Mikið var um teymisvinnu á námskeiðinu, meðal hápunkta voru að nota sex hugsunarhatta Edward de Bono (e. The Six Thinking Hats) til að greina og leysa vandamál í hópi. En með slíkan hatt á höfði þarf hver einasti einstaklingur að máta sig við mismunandi viðhorf gagnvart vandamálinu, t.d. skapandi hugsun, bjartsýni, og gagnrýna hugsun.
Dvölin á Sikiley var afar lærdómsrík, og naut Sæunn þess að kynnast fólki frá fjölmörgum Evrópulöndum: t.d. Litháen, Lúxemborg, Spáni, og Póllandi. Því gafst einnig tækifæri til að mynda tengsl við sérfræðinga í öðrum löndum sem möguleiki er á að vinna með síðar meir. Mörg höfðu jafnframt áhuga á að heimsækja Háskólann á Akureyri.
Sæunn nýtti sér beina flugið frá Akureyri með Transavia til Amsterdam og flaug svo áfram frá meginlandinu. En ljóst er að aukin erlend umsvif um Akureyrarflugvöll nýtast starfsfólki Háskólans á Akureyri vel.
Á miðvikudeginum var stuttur dagur til að nemendur gætu heimsótt strandbæinn Cefalú, en þess fyrir utan voru þau sem sóttu námskeiðið dugleg að skoða sig um, meðal annars fór hópurinn saman á Ennio Morricone tónleika í óperuhúsinu í Palermo.
Sæunni naut þess að sækja námskeiðið og að vera á þessari mögnuðu eyju þar sem margir, til dæmis Halldór Kiljan Laxness, hafa fundið fyrir miklum innblæstri í sköpun. Sæunn mælir með að starfsmenn háskólans nýti sér tækifærið að sækja námskeið í gegnum Erasmus+ mobility til að sækja sér aukna þekkingu og mynda tengsl við aðra skóla.