Matvælasjóður skapar ávinning

Úttekt sem Rannsóknamiðstöð Háskólans á Akureyri (RHA) gerði á Matvælasjóði sýnir að á árunum 2020-2024 hafi sjóðurinn skapað umtalsverðan ávinning fyrir íslenskan matvælageira og að meginmarkmið sjóðsins (nýsköpun, sjálfbærni, verðmætasköpun og samkeppnishæfni) hafi náðst. Markmið úttektarinnar var að meta efnahagsleg og samfélagsleg áhrif sjóðsins og úthlutana ásamt áhrifum á styrkþega.

Yfirgnæfandi meirihluti styrkþega, eða um 90%, telur að styrkir Matvælasjóðs hafi verið grundvallarforsenda þess að verkefni þeirra næðu fram að ganga. Flestir sögðu að verkefnin hefðu ekki orðið að veruleika án styrksins.

Fram kemur að frá árinu 2020 til ársins 2024 voru veittir alls 283 styrkir að heildarupphæð 2.701 m.kr. í fjórum styrkjaflokkum: Báru, Keldu, Afurð og Fjársjóði.

Í úttektinni kemur einnig fram að í styrkjaflokknum Fjársjóði hafi náðst að tengja vörur við markað og hafi það haft hvað mest áhrif á útflutning og markaðssetningu, m.a. með þátttöku á alþjóðlegum sýningum og uppbyggingu tengslanets. Einnig drógu styrkir úr fjárhagsáhættu og studdu tekjumyndun og ímynd verkefnisins.

RHA sendi spurningakönnun á 225 styrkþega Matvælasjóðs sem höfðu fengið styrk á tímabilinu. Svarhlutfall var 52,4%. Jafnframt voru tekin viðtöl við 16 þessara styrkþega.

„Þessi úttekt RHA staðfestir mikilvægi Matvælasjóðs fyrir verðmætasköpun í matvælageiranum“ segir Hanna Katrín Friðriksson atvinnuvegaráðherra. „ Við leggjum áherslu á samkeppnishæfni og nýsköpun, fram komnar ábendingar um mögulegar úrbætur munu einnig nýtast við þróun og starfsemi sjóðsins.“

Við gerð úttektarinnar komu fram ábendingar frá styrkþegum um að einfalda mætti umsóknarferlið, hraða greiðslum og lækka mótframlag, sérstaklega fyrir minni fyrirtæki. Jafnframt var bent á auka mætti eftirfylgni og ráðgjöf eftir úthlutun.

Mikil eftirspurn er eftir stuðningi úr Matvælasjóði, aðeins fjórðungur umsækjenda fékk styrk úr sjóðnum. Opið er fyrir styrkumsóknir til 28 febrúar á síðu sjóðsins.

Hér má lesa úttektina í heild sinni.