Gleðileg jól



RHA óskar samstarfsaðilum og viðskiptavinum nær og fjær 
gleðilegra jóla og farsældar á nýju ári.

Norðurslóðadagurinn 14. nóvember

Hvernig eflum við þátttöku íslensks vísindasamfélags í alþjóðlegri  samvinnu og stefnumótun um norðurslóðir?



Samvinnunefnd um málefni norðurslóða  býður til opins Norðurslóðadags í húsnæði Hafrannsóknastofnunar,  Sjávarútvegshúsinu, Skúlagötu 4, ráðstefnusal 1. hæð fimmtudaginn 14. nóvember 2013  kl. 09:00 – 17:30.

Lokaráðstefna ESPON-verkefnisins KITCASP

Dagana 16.-18. október var haldin í Glasgow lokaráðstefna KITCASP-verkefnisins (Key Indicators for Evidence-based Spatial Planning) en í verkefninu var unnið að þróun og vali 20 vísa (indicators) til að nota við skipulagsvinnu í ríkjum Evrópu. Verkefnið var unnið í nánum tengslum við hagsmunaaðila í þeim fimm löndum sem aðild áttu að rannsókninni, en það voru Baskaland, Írland, Ísland, Lettland og Skotland. Írar í byggðarannsóknastöðinni (National Institute for Regional and Spatial Analysis) í Maynooth fóru með verkefnisstjórn en Graeme Purvis hjá skosku ríkisstjórninni fór fyrir hagsmunaaðilum. Fyrir hönd hagsmunaaðila á Íslandi tók Skipulagsstofnun virkan þátt í verkefninu og var Landsskipulagsstefna 2013-2024 sú áætlun sem var einkum lögð til grundvallar í íslenska hluta rannsóknarinnar en einnig var litið til byggðaáætlunar og Ísland 2020. Lokaskýrsla KITCASP er væntanleg innan tíðar.

RHA, HA og NRF á Arctic Circle

Alþjóðaráðstefnan Arctic Circle var haldin í fyrsta sinn í Hörpu um helgina frá laugardegi til mánudags. Þar komu saman rúmlega 900 manns til að ræða málefni norðurslóða.


Fulltrúar frá HA, NRF og RHA 

RHA tekur þátt í Vísindavöku RANNÍS

Vísindavaka Rannís verður haldin í Háskólabíói föstudaginn 27. sept. kl. 17:00-22:00. Rannsóknamiðstöð HA verður þar með kynningu á miðstöðinni ásamt því að kynna niðurstöður úr verkefninu Climate Changes og er yfirskrift kynningarinnar Loftslagsbreytingar - Hvað vita Íslendingar? Nánari upplýsingar um dagskrá Vísindavöku RANNÍS er að finna hér


Breytingar á starfsmannahaldi RHA

Þær breytingar hafa orðið á starfsmannahaldi RHA að Sigrún Vésteinsdóttir verkefnisstjóri hefur hafið störf að nýju  eftir fæðingarorlof.  Hjalti Jóhannesson mun koma til starfa eftir helgina eftir afleysingu sem sveitastjóri í Hörgárbyggð. Halla Hafbergsdóttir hóf störf sl. vor og mun leysa Hjördísi Sigursteinsdóttur sérfræðing af sem nú er í leyfi.
Halla er viðskiptafræðingur að mennt og lauk í vor meistaragráðu í Náttúrutengdri ferðaþjónustu frá Universitetet for miljø- og biovitenskap í Noregi.  Hún hefur meðal annars starfað sem verkefnisstjóri, skrifstofustjóri og verslunarstjóri. 
Þá hefur Marta Einarsdóttir verið ráðinn til starfa hjá RHA. Marta hefur nýlokið doktorsprófi frá East Anglia háskólanum í Bretlandi  á sviði menntavísinda með áherslu á kynjafræði og þróunarfræði. Hún lauk meistaraprófi frá sama háskóla í þróunarfræði með áherslu á kynjafræði. Þar áður lauk hún kennaraprófi frá Det Nødvendige Seminarium í Danmörku, diplómanámi í hagnýtri fjölmiðlun frá Háskóla Íslands og BA prófi í sálarfræði frá sama skóla. Hún hefur áður starfað sem verkefnisstjóri félagslegra verkefna í Mósambík fyrir Þróunarsamvinnustofnun Íslands, sem grunnskólakennari og við sölu- og skrifstofustörf. 


Vel heppnuð ráðstefna um Loftslagsbreytingar á norðlægum svæðum

Þann 22.-23. ágúst fór fram í Háskólanum á Akureyri ráðstefnan Loftslagsbreytingar á norðlægum svæðum (Climate Change in Northern Territories. Sharing Experiences, Exploring New Methods and Assessing Socio-Economic Impacts). Ráðstefnan var samvinnuverkefni Evrópuverkefnisins ESPON – ENECON og Rannsóknarþings Norðursins (NRF). Bæði verkefnin eru vistuð við RHA – Rannsókna- og þróunarmiðstöð Háskólans á Akureyri. Alls voru flutt 48 erindi um málefni Norðurslóða auk opnunarávarps Ólafs Ragnars Grímssonar forseta Íslands. Ráðstefnuna sóttu alls 110 manns frá 14 löndum. Helmingur þátttakenda eða 57 voru þó Íslendingar, flestir þeirra frá HA og Akureyri. Starfsmenn Háskólans á Akureyri fluttu alls 14 erindi á ráðstefnunni. Það mun vera metfjöldi á framlögum starfsmanna skólans á alþjóðlegri ráðstefnu. Ráðstefnan tókst mjög vel og var hún mikilvægt framlag til umræðu um umhverfismál á norðurslóðum. Erindin voru tekin upp og verða birt innan skamms á heimasíðu ráðstefnunnar.

RHA skipuleggur ráðstefnu Rannsóknaþings Norðursins (NRF)

Yfirskrift ráðstefnunnar er:
CLIMATE CHANGE IN NORTHERN TERRITORIES                       
Sharing Experiences and Exploring New Methods Assessing Socio-Economic Impacts

Þetta er 7. ráðstefna Rannsóknarþings Norðursins, e: Northern Research Forum (NRF) en áður hafa ráðstefnur NRF verið haldnar, auk Íslands, í Rússlandi, Kanada, Bandaríkjunum, Finnlandi og Svíþjóð. Að þessu sinni er rannsóknaþingið haldið í samvinnu við Evrópuverkefnið ESPON/ENECOM hér á Akureyri í húsakynnum Háskólans.  

Yfirskrift ráðstefnunnar er Umhverfisbreytingar á norðlægum slóðum og verða um 60 erindi flutt á ráðstefnunni í  fjölda málstofa. Yfir hundrað manns hafa þegar skráð sig og er búist við um 120 þátttakendum. Forseti Íslands, herra Ólafur Ragnar Grímsson opnar ráðstefnuna. Tveir starfsmenn RHA verða með erindi á ráðstefnunni, Eva Halapi með erindið: Climate Change – Perceptions and knowledge among young adults in Iceland og Anna Lilja Sigurvinsdóttir með erindið: Awareness, perception and attitudes on global climate change among Icelanders.

Ráðstefnan verður haldin í Háskólanum á Akureyri dagana 22.-23. ágúst. Allar nánari upplýsingar og skráningareyðublað er að finna á www.nrf.is

 

RHA er einn af stofnaðilum Norðurslóðanets Íslands

 

Norðurslóðanet Íslands - þjónustumiðstöð norðurslóða (Icelandic Arctic Cooperation Network) er sameiginlegur vettvangur stofnana, fyrirtækja og annarra hagsmunaaðila á Íslandi sem vinna að málefnum norðurslóða. Norðurslóðanetið hvetur til fjölbreytilegrar þátttöku hagsmunaaðila frá öllum landshlutum. Tilgangur netsins er að styðja við samstarf félaga sinna; auka sýnileika og skilning á málefnum svæðisins; upplýsa áhugasama innanlands og erlendis um þá þekkingu, reynslu og mannauð sem Ísland býr yfir; einfalda aðgengi að upplýsingum um norðurslóðir; og veita leiðbeiningar og ráðgjöf þeim sem til netsins leita. www.arcticiceland.is

 

Aðstoðarforstöðumaður RHA í afleysingar sem sveitarstjóri

Hjalti Jóhannesson, aðstoðarforstöðumaður RHA hefur verið ráðinn tímabundið til 1. september til að sinna störfum sveitarstjóra Hörgarsveitar. Hann mun verða í leyfi frá RHA á meðan en fylgja þó eftir nokkrum verkefnum á stofnuninni fyrst um sinn.